حمزة بن عبد المطلب بقلم محمود_المزين

(حمزة بن عبد المطلب )
أخ لرسول الله
فى الأصل كان عمه
يكبر وهو معاه
ما هو أصله من دمه

زى الأسد تلقاه
ولا حد بيهمه
صفوة قريش تخشاه
تسلم ايديه وفمه
كان همه انه يكون
فى الكفر م السادة
كان للصنم بيصون
وبيديله عبادة
راح لاجل صيده فى يوم
مع قوسة كالعادة
راجع فى نص اليوم
قاصد بيت السادة
جاله الخبر علطول
عن ابن أخوه وصاحبه
إن اللى هانه جهول
فمسك قوسه وسحبه
لمحه فى وسط الناس
قاعدين بيتصاحبوا
ضرب الجهول فى الراس
وبعز ما فى رحبه
أعلن وقال فى الحال
إنه خلاص أسلم
صاب الجميع أهوال
مش قادرة تتكلم
قالها فى ساعة إصرار
لكنه ما إستسلم
حس القرار من نار
فى القلب بتعلم
ازاى فى لحظة يسيب
دين أهله وجدوده
صح ان عنده حبيب
بس انكسر عوده
قرر ينول تفكير
بين سيئه وجوده
قارن كتير وكتير
وجد الهدى يسوده
قالها لرسول الله
والفرحة كات تكمل
انه هيبقى معاه
فى الدعوة للأكمل
سيدنا النبى سماه
اسم ولا أجمل
إنه أسد لله
بحبه القلوب تثمل
من كتر ما بيخشوه
قاموا أجَروا واحد
فى غزوة أحد قتلوه
لمقابلة الواحد
سيدنا النبى بينعيه
دمعة عينيه ساحت
يا رب ترضى عليه
دى قلوبنا ليه راحت
#محمود_المزين