طابور.. بقلم// محمد الصيرفى

طابور العيش بقا ذل
وطعم الرغيف صار مر
ووزنه يا خساره قل
والناس دليلها احتار
يفتخر بكام رغيف نال
ويحضنه وهو مولع نار
اصله مش لاقى بديل
والحر منه غالى يغور
وفى الطابور يقعد يحتال
يمكن يقدموه فى الدور
ويشتكى ويعمل نفسه عليل
بس الكل على دوره عجول
والوقف فى الطابور بطول
لحد ما يجى بصيص من نور
يقولوا خلاص النت مقفول
ويرجع يا عينى على الدار
ولمراته وعياله يا عينى يقول
ضاع خلاص علينا المشوار
بكره نعيد الكره يا عيال
وناخد دورنا فى اول الطابور
راح قبل صلاة الفجر بقليل
لقى الناس سبقته فى التفكير
وقف بين الناس مشغول البال
مش عارف اخرتها وايه المصير
حس بانه اصبح مشلول
وعلى رغيف العيش غيور